އިންޑިއާގެ ނެޝަނަލް ސެންޓަރ ފޮރ ގުޑް ގަވަރނަންސް (އެންސީޖީޖީ) އާއި ސިވިލް ސަރވިސް ކޮމިޝަން (ސީއެސްސީ) އާ ދެމެދު ވެފައިވާ އެމްއޯޔޫގެ ދަށުން، ތަމްރީން ޕްރޮގްރާމެއްގައި ބައިވެރިވުމަށް ސިވިލް ސަރވިސްގެ 37 ވަނަ ބެޗް މިއަދު އިންޑިއާއަށް ފުރައިފިއެވެ.
މި ބެޗްގެ މުވައްޒަފުން ފުރުމުގެ ކުރިން، އިންޑިއާގެ ހައި ކޮމިޝަނަރ ޖީ. ބަލަސުބްރަމަނިއަން ވަނީ އެ ފަރާތްތަކާ ބައްދަލުކޮށް، ހެޔޮ އެދުންތައް ފާޅުކުރައްވާފައެވެ. މި ތަމްރީން ޕްރޮގްރާމް ކުރިއަށްދާނީ ޖޫން 23 އިން ޖުލައި 4 އަށް މުސޫރީގައެވެ.
އިންޑިއާ އާއި ދިވެހިރާއްޖެއާ ދެމެދު އޮތް ގާތް ގުޅުމުގެ ތެރެއިން، ދެ ގައުމުގެ މެދުގައި ވެފައިވާ އެއްބަސްވުންތަކުގެ ދަށުން، ދިވެހި ސިވިލް ސަރވިސްގެ މުވައްޒަފުންނަށް އެކި ދާއިރާތަކުން ތަމްރީނު ދިނުމުގެ ޕްރޮގްރާމްތައް ކުރިއަށް ގެންދެއެވެ.
މި ތަމްރީން ޕްރޮގްރާމްގެ މައިގަނޑު މަޤްޞަދަކީ ދިވެހި ސިވިލް ސަރވިސްގެ ޚިދުމަތްތައް އިތުރަށް ހަރުދަނާކޮށް، ރައްޔިތުންނަށް ދެވޭ ޚިދުމަތުގެ ފެންވަރު މަތިކުރުމެވެ. އަދި ދެ ގައުމުގެ މެދުގައި އޮތް އެކުވެރިކަން އިތުރަށް ބަދަހިކުރުމެވެ.
އިންޑިއާގެ އެންސީޖީޖީ އަކީ ރަނގަޅު ވެރިކަމުގެ އުސޫލުތަކާއި، ސަރުކާރުގެ ހިންގުން ހަރުދަނާކުރުމަށް މަސައްކަތްކުރާ މުއައްސަސާއެކެވެ.
