އެމެރިކާއިން ޔަމަނުގެ އުތުރުގައި ހިމެނޭ ސަނާ އަދި އަލް-ޖައުފް ސަރަހައްދުތަކަށް ވައިގެ މަގުން 8 ހަމަލާ ދީފައިވާކަމަށް ޔަމަނުގެ ހޫތީން ބުނެފިއެވެ. މިއީ ދެ ގައުމުގެ ދެމެދުގައި އިތުރަށް ހަމަނުޖެހުން އުފެދެމުންދާ ދަނޑިވަޅެއްގައި ދީފައިވާ ހަމަލާތަކެކެވެ.
ހޫތީންގެ ސަބާ ނިއުސް އެޖެންސީން ރިޕޯޓުކޮށްފައިވާ ގޮތުގައި، މި ހަމަލާތަކުގެ ތެރެއިން އެއް ހަމަލާ އަމާޒުވެފައިވަނީ ސަނާ ޕްރޮވިންސްގެ ބަނީ ހަޝިޝް ސަރަހައްދަށެވެ. އަދި ބާކީ ހަމަލާތައް އަމާޒުވެފައިވަނީ އަލް-ޖައުފް ޕްރޮވިންސްގެ ހަބް ވަ އަޝް ޝައާފް ސަރަހައްދަށެވެ. ނަމަވެސް މި ހަމަލާތަކުން ލިބުނު ގެއްލުމާއި މަރުވި އަދި ޒަހަމްވި މީހުންގެ އަދަދު އަދި ހާމަކޮށްފައެއް ނުވެއެވެ.
މި ހަމަލާތަކާ ގުޅޭގޮތުން އެމެރިކާއިން އަދި އެއްވެސް ރަސްމީ ބަޔާނެއް ނެރެފައެއް ނުވެއެވެ. އެހެންނަމަވެސް، މިއާ ގުޅުންހުރި ކަމެއްގެ ގޮތުން، އިޒްރޭލުގެ ސިފައިންގެ ފަރާތުން ބުނެފައިވަނީ ހުކުރު ދުވަހު ދެ ފަހަރެއްގެ މަތިން މިސައިލް އިންޓަސެޕްޓް ކުރުމަށްފަހު، ހޮނިހިރު ދުވަހުވެސް ޔަމަނުން ދޫކޮށްލި މިސައިލްއެއް އިންޓަސެޕްޓް ކުރެވުނު ކަމަށެވެ.
ހޫތީން ބުނެފައިވާ ގޮތުގައި، މާޗް މަހުގެ މެދުން ފެށިގެން އެމެރިކާއިން ވަނީ ޔަމަނަށް 1,300 ވައިގެ އަދި ކަނޑުގެ ހަމަލާ ދީފައެވެ. އަދި މި ހަމަލާތަކުގައި ސަތޭކައެއްހާ އާންމު ރައްޔިތުން މަރުވެ އަދި ޒަހަމްވެފައިވާ ކަމަށް ބުނެފައިވެއެވެ.
ހޫތީންގެ މައްޗަށް އެމެރިކާއިން ދޭ ހަމަލާތައް އިތުރުވެފައިވަނީ، އިޒްރޭލުން ޣައްޒާގެ ފަލަސްތީނުންނަށް ދެމުންދާ ހަމަލާތަކަށް ރައްދު ދިނުމުގެ ގޮތުން، ހޫތީން ރަތް ކަނޑުގައި ދަތުރުކުރާ އިޒްރޭލަށް ދާ އުޅަނދުފަހަރަށް ހަމަލާދޭން ފެށުމާ ގުޅިގެންނެވެ.
