ކަޝްމީރުގެ އިންޑިއާގެ ބާރުގެ ދަށުގައި އޮންނަ ޕަހަލްގަމްގައި ދިން ޓެރަރިސްޓް ހަމަލާ ރައީސް ޑރ. މުހައްމަދު މުއިއްޒު ކުށްވެރިކުރައްވައިފި އެވެ.
އިއްޔެ ކަޝްމީރުގެ ޕަހަލްގަމް ރިސޯޓުގައި ބަޑިން ދިން އެ ހަމަލާގައި 25 މީހުން ވަނީ މަރުވެފަ އެެވެ. އޭގެތެރޭގައި 22 ފަތުރުވެރިން ހިމެނެއެވެ. އެ ހަމަލާތަކުގައި 17 މީހަކު ޒަހަަމްވެފައިވާ ކަމަށް ވެސް ބުނެފައިވެ އެވެ.
އެ ހަމަލާ ކުށްވެރިކުރައްވާ މިއަދު "އެކްސް" ގައި ކުރެއްވި ޕޯސްޓުގައި ރައީސް ވިދާޅުވީ ޕަހަލްގަމްގައި ދިން ޓެރަރިޒަމްގެ ހަމަލާގައި ބަޔަކު މަރުވެ، ޒަހަމްވެފައިވާ ހަބަރުން ސިހުން ލިބިވަޑައިގެންފައިވާ ކަމަށެވެ.
އަދި އެކަމާ މެދު ހިތާމަކުރައްވާކަން ފާހަގަކުރައްވައި ރައީސް ވިދާޅުވީ ހުރިހާ ބާވަތެއްގެ ޓެރަރިޒަމް ހުއްޓުވަން މަސައްކަތް ކުރުމުގައި ސާބިތުކަމާއެކު ރާއްޖެއިން ދެމި އޮންނާނެ ކަމަެވެ.
ޕަހަލްގަމްގައި ދިން ހަމަލާ އާ ގުޅިގެން ސައުދީ އަރަބިއްޔާއަށް ކުރައްވަމުން ގެންދެވި ދަތުރުފުޅު ކުރުކުރައްވައި ބޮޑުވަޒީރު ނަރެންދުރަ މޯދީ ވަނީ އެނބުރި އިންޑިއާއަށް ވަޑައިގެންފަ އެވެ. ވިދާޅުވެފައި ވަނީ އެ ހަމަލާ ދިނުމުގެ ޒިންމާވާ ފަރާތްތައް ހޯދާނެ ކަމަށެވެ.
