ރިޔާސީ އިންތިޚާބު އެއްބުރުން ނިންމުމަށް ކުރީގެ ރައީސް މުޙައްމަދު ނަޝީދު މިއަދު ތާޢީދު ކުރައްވައިފިއެވެ. މިގޮތަށް ތާޢީދު ކުރައްވާފައިވަނީ ރައީސް ޑރ. މުޙައްމަދު މުޢިއްޒު އެ ވިސްނުން ގެންގުޅުއްވާކަން ޕީއެންސީގެ މަޖިލިސް މެންބަރުންނާ ހިއްސާ ކުރެއްވުމާ ގުޅިގެންނެވެ.
ރައީސް ނަޝީދު ވިދާޅުވެފައިވަނީ ޕްރިފަރެންޝަލް ވޯޓާއި އެކުގައިނަމަ އެއްބުރުން ވޯޓުލައި ނިންމާ ސަރުކާރެއް އުފައްދާ އުސޫލަކީ ރަނގަޅު އުސޫލެއް ކަމަށް ޤަބޫލުފުޅު ކުރައްވާ ކަމަށެވެ. މި މައްސަލައާ ގުޅިގެން ޢާންމުން ދަނީ މީސްމީޑިއާގައި ތަފާތު ޚިޔާލުތައް ފާޅުކުރަމުންނެވެ.
ރައީސް ޑރ. މުޢިއްޒު ވަނީ ރިޔާސީ އިންތިޚާބު ފުރަތަމަ ބުރުން ނިންމުމާމެދު ޢާންމުންގެ ފެންނަ ނުފެންނަ ވޯޓެއް ނެގުމަށް މަސައްކަތް ކުރައްވަމުން ގެންދަވާކަން ހާމަކުރައްވާފައެވެ. އަދި މީގެއިތުރުން، މަޖިލިސް އިންތިޚާބާއި ރިޔާސީ އިންތިޚާބު އެކުއެކީ ބޭއްވުމާމެދުވެސް ރައްޔިތުންގެ ޚިޔާލު ހޯއްދެވުމަށް ވިސްނާވަޑައިގަންނަވާ ކަމަށް ވިދާޅުވެފައިވެއެވެ.
މިހާރުގެ ޤާނޫނީ އޮނިގަނޑު: ޤާނޫނު އަސާސީގައި މިހާރު އޮންނަ ގޮތުން ރިޔާސީ އިންތިޚާބުގެ ފުރަތަމަ ބުރުގައި އެއްވެސް ކެންޑިޑޭޓަކަށް ވޯޓު ދިން މީހުންގެ އަޣުލަބިއްޔަތު ނުލިބޭނަމަ، ދެވަނަ ބުރެއް ބާއްވަން ޖެހެއެވެ. ރައީސް ކަމަށް ކާމިޔާބު ކުރައްވާ ބޭފުޅަކަށް ވާންޖެހެނީ ވޯޓު ދިން މީހުންގެ 50 އިންސައްތައަށްވުރެ އިތުރަށް އެއް ވޯޓު ހޯއްދަވާ ބޭފުޅެކެވެ.
ފާހަގަކޮށްލެވޭ ކަމަކީ، އާ ޤާނޫނު އަސާސީގެ ދަށުން މިހާތަނަށް ބޭއްވުނު ހުރިހާ ރިޔާސީ އިންތިޚާބެއްގައިވެސް ރައީސް ކަމަށް ބޭފުޅަކު އިންތިޚާބުވެފައިވަނީ އިންތިޚާބުގެ ދެވަނަ ބުރުގައި ކަމަށްވުމެވެ.
