ރާއްޖެއަށް މިވަގުތު އެންމެ ރަނގަޅު ގޮތަކީ އެމްޑީޕީއާއި ޑިމޮކްރެޓްސް ގުޅުން ކަމަށް ރާއްޖޭގެ ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.
އެކްސްގައި ނަޝީދު ވިދާޅުވެފައިވަނީ، ދެ ޕާޓީ އެއްބައިވުމަކީ ހަމައެކަނި ރާއްޖެއަށް ނޫން، އެމްޑީޕީ އަދި ޑިމޮކްރެޓްސްއަށް ވެސް އެންމެ ފައިދާހުރި ގޮތް ކަމަށެވެ.
ޑިމޮކްރެޓިކް ޕާޓީއަކީ އެމްޑީޕީގެ ރިޔާސީ ޕްރައިމަރީގައި ނަޝީދު ބަލިވެވަޑައިގަތުމަށްފަހު، އެމްޑީޕީން ވަކިވެވަޑައިގެން އުފެއްދެވި ޕާޓީއެކެވެ. އެހެންނަމަވެސް، އެ ޕާޓީއަށް އެކަށީގެންވާ ކާމިޔާބެއް ލިބިފައެއް ނުވެއެވެ. އެންމެ ފަހުން ބޭއްވުނު ރައްޔިތުންގެ މަޖިލީހުގެ އިންތިޚާބުގައި ވެސް އެ ޕާޓީއަށް އެއްވެސް ގޮނޑިއެއް ހޯދާލެވިފައެއް ނުވެއެވެ.
މި ބަޔާން އައިސްފައިވަނީ އެމްޑީޕީގެ ރިޔާސީ ޕްރައިމަރީގައި ކުރީގެ ރައީސް އިބްރާހީމް މުހައްމަދު ސޯލިހު ވާދަކުރައްވާނެ ކަމުގެ ވާހަކަތައް ދެކެވެމުންދާ ދަނޑިވަޅެއްގައެވެ. މީގެ އިތުރުން، އެމްޑީޕީގެ ޗެއާޕާސަން ފައްޔާޒު އިސްމާއީލް އަދި ޕާޓީގެ ރައީސް އަބްދުﷲ ޝާހިދު ވެސް ވަނީ ރިޔާސީ އިންތިޚާބަށް ކުރިމަތިލެއްވުމުގެ ޝައުޤުވެރިކަން ފާޅުކުރައްވާފައެވެ.
ނަޝީދަކީ 15 އަހަރަށްވުރެ ދިގު މުއްދަތެއްގައި އެމްޑީޕީގެ އެންމެ އިސް ލީޑަރުކަން ކުރައްވާފައިވާ ބޭފުޅެކެވެ. އަދި 2008، 2013 އަދި 2018 ވަނަ އަހަރު ބޭއްވުނު ރިޔާސީ އިންތިޚާބުތަކުގައި އެމްޑީޕީގެ ކެންޑިޑޭޓްގެ ގޮތުގައި ވާދަކުރެއްވި ބޭފުޅެކެވެ. އެހެންނަމަވެސް، މިހާރު ޑިމޮކްރެޓްސް އުފެއްދެވުމުގައި އިސްކޮށް އުޅުއްވި ގިނަ ބޭފުޅުން ވަނީ އަލުން އެމްޑީޕީއާ ގުޅިވަޑައިގެންފައެވެ.
