ރާއްޖޭގައި ޙާފިޡުންގެ އަދަދު އިތުރުކުރުމަށް އެންމެން ގުޅިގެން މަސައްކަތްކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.
އިސްލާމީ މަރުކަޒުގައި މިރޭ ބޭއްވި ޙާފިޡުން ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، މިފަހަރު 24 ޙާފިޡުން ދަސްވެނިވިކަމީ އުފާކުރަންޖެހޭ ކަމެއް ނަމަވެސް، ސައްތައިން ސައްތަ މުސްލިމު ޤައުމެއްގެ ގޮތުގައި މިއަށްވުރެ މަތީ އަމާޒުތަކެއް ބަހައްޓަންޖެހޭ ކަމަށެވެ.
ކީރިތި ޤުރްއާން ކިޔަވައިދިނުމުގެ ދާއިރާ ކުރިއެރުވުމަށް ސަރުކާރުން ކުރައްވަމުންދާ މަސައްކަތްތަކުގެ ތެރޭގައި، ޤުރްއާނާބެހޭ ޚާއްޞަ ވަޤުފް އިމާރާތެއް އެޅުމުގެ މަސައްކަތް ހިމެނޭކަން ރައީސް ފާހަގަކުރެއްވިއެވެ. އެގޮތުން މާލޭގައި އެ އިމާރާތް އެޅުމަށް ވަނީ ބިމެއް ކަނޑައަޅުއްވާފައެވެ. އަދި ރަމަޟާން މަހުގެ ބަންދަށްފަހު ސަރުކާރުގެ އޮފީސްތައް ހުޅުވުމާއެކު، އެކަމާގުޅޭ ރަސްމީ ލިޔެކިޔުންތައް އިސްލާމިކް މިނިސްޓްރީއަށް ފޮނުއްވާނެ ކަމަށް އެމަނިކުފާނު ވިދާޅުވިއެވެ.
ރައީސް މުޢިއްޒު ވިދާޅުވީ ވަޤުފް އިމާރާތުގެ މަޝްރޫޢަކީ ދީނީ އަދި އިޖްތިމާޢީ ގޮތުން ވެސް މުހިންމު އިންވެސްޓްމަންޓެއް ކަމަށެވެ. އަދި މައިންބަފައިންނާއި މުދައްރިސުންގެ އެހީތެރިކަމާއެކު ގިނަ ކުދިންތަކެއް ޙާފިޡުންގެ ގޮތުގައި އުފެއްދުމަކީ މި ސަރުކާރުގެ އަމާޒެއްކަމުގައި ވިދާޅުވިއެވެ.
ރަސްމިއްޔާތު ނިންމަވާލައްވަމުން ރައީސް ވަނީ ޙާފިޡުކަން ޙާޞިލުކުރުމަށް ދަރިވަރުން ކުރައްވާފައިވާ މިންނެތް މަސައްކަތް ފާހަގަކުރައްވައި، އެ ފަރާތްތަކަށް ހޫނު މަރުޙަބާއެއް ދަންނަވާފައެވެ.
