އިންޑިއާގެ ބޮޑުވަޒީރު ނަރެންދްރަ މޯދީ، ފަލަސްޠީނުގެ ރައީސް މަޙްމޫދު އައްބާސްއާ ނިއުޔޯކުގައި ބައްދަލުކުރައްވައި، ޣައްޒާގައި ކުރިމަތިވެފައިވާ އިންސާނީ ހާލަތާމެދު ފުން ކަންބޮޑުވުން ފާޅުކުރައްވައިފިއެވެ.
އިންޑިއާގެ ބޭރުގެ ކަންކަމާބެހޭ ވުޒާރާއިން ނެރުއްވާފައިވާ ބަޔާނެއްގައި ބުނެފައިވާ ގޮތުގައި، މި ބައްދަލުވުން ބޭއްވުނީ ސެޕްޓެމްބަރު 22 ވަނަ ދުވަހު، ނިއުޔޯކުގައި ބޭއްވުނު "ސަމިޓް އޮފް ދަ ފިއުޗަރ" ގެ އަރިމަތީގައެވެ.
ބައްދަލުވުމުގައި ބޮޑުވަޒީރު މޯދީ، ޣައްޒާގެ ހާލަތާއި ސަރަޙައްދުގެ ސަލާމަތީ ޙާލަތު ގޯސްވަމުންދާތީ ކަންބޮޑުވުން ފާޅުކުރެއްވުމާއެކު، ފަލަސްޠީނުގެ ރައްޔިތުންނަށް އިންޑިއާގެ ދެމެހެއްޓެނިވި އެހީތެރިކަން ލިބިދޭނެކަން އަލުން ކަށަވަރުކޮށްދެއްވިއެވެ. އަދި އިސްރާއީލު-ފަލަސްޠީނު މައްސަލައިގައި އިންޑިއާގެ އުސޫލީ މައުޤަފު ތަކުރާރުކޮށް، ހަނގުރާމަ ހުއްޓާލުމަށާއި، ހައްޔަރުކޮށްފައިވާ މީހުން ދޫކޮށްލުމަށާއި، މަޝްވަރާއާއި ޑިޕްލޮމަސީގެ މަގަށް އެނބުރި ދިއުމަށް ގޮވާލެއްވިއެވެ.
ބޮޑުވަޒީރު މޯދީ ވިދާޅުވީ، ސަރަޙައްދުގައި ދެމެހެއްޓެނިވި ސުލްޙައާއި ހަމަޖެހުން ގެނެވޭނީ ދެ ދައުލަތުގެ ޙައްލަކުން ކަމަށެވެ. އަދި އިންޑިއާއަކީ ފަލަސްޠީނު ފުރަތަމަ ބަލައިގަތް ޤައުމުތަކުގެ ތެރެއިން އެއް ޤައުމުކަން ހަނދާންކޮށްދެއްވައި، އދ. ގައި ފަލަސްޠީނުގެ މެމްބަރޝިޕަށް އިންޑިއާގެ ތާއީދު ދެމެހެއްޓޭނެކަން އަންގަވައިދެއްވިއެވެ.
މި ބައްދަލުވުމުގައި އިންޑިއާ-ފަލަސްޠީނު ދެމެދުގެ ގުޅުމުގެ އެކި ދާއިރާތަކާ ބެހޭގޮތުން މަޝްވަރާކުރެވުނެވެ. މީގެ ތެރޭގައި އދ. ގައި ފަލަސްޠީނަށް އިންޑިއާއިން ދޭ އެހީތެރިކަމާއި، ތަޢުލީމު، ޞިއްޙަތު އަދި އެހެނިހެން ޤާބިލުކަން އިތުރުކުރުމުގެ މަސައްކަތްތަކުގައި އިންޑިއާއިން ދެމުންދާ އެހީތެރިކަން ހިމެނެއެވެ. އަދި ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށް ދެ ލީޑަރުންވެސް އެއްބަސްވެވަޑައިގަތެވެ.
