ޖަޕާން އިންޓަނޭޝަނަލް ކޯޕަރޭޝަން އެޖެންސީ (ޖައިކާ) އިން ރާއްޖެއަށް 10 މިލިއަން ޑޮލަރުގެ އެހީއެއް ދޭން ނިންމައި އެކަމުގެ އެއްބަސްވުމުގައި ސޮއިކޮށްފިއެވެ. މި އެހީއަކީ ކާރިސާތަކާ ގުޅޭ ވިލުންތެރިކަން އިތުރުކޮށް، އެފަދަ ހާލަތްތަކަށް ތައްޔާރުވުމަށް ދޭ 1.56 ބިލިއަން ޖަޕަނީސް ޔެން (10.5 މިލިއަން ޑޮލަރު) ގެ އެހީއެކެވެ.
އިއްޔެ ފިނޭންސް މިނިސްޓްރީގައި ބޭއްވުނު ރަސްމިއްޔާތެއްގައި މި އެހީގެ އެއްބަސްވުމުގައި ސޮއިކުރެއްވީ ޖައިކާ މޯލްޑިވްސް އޮފީހުގެ ރެސިޑެންޓް ރެޕްރެޒެންޓޭޓިވް ޓަކި މޮޓޮއޯ އާއި ފިނޭންސް މިނިސްޓްރީގެ ޑެޕިއުޓީ މިނިސްޓަރު ހަސަން މިރާސްއެވެ.
ޖައިކާއިން ނެރުނު ބަޔާނެއްގައި ބުނެފައިވާ ގޮތުގައި މި އެހީގެ ދަށުން މާލޭގެ ކަނޑުތޮށި ވަރުގަދަކުރުމާއި، ވާރޭ ފެން ހިންދުމަށް ބޭނުންވާ އާލާތްތައް ހޯދުން ހިމެނެއެވެ. މީގެ އިތުރުން އުދައާއި ބޯކޮށް ވެހޭ ވާރެއިން ކުރިމަތިވާ ނުރައްކާތައް ކުޑަކުރުމަށް މަގުފަހިވެގެންދާނެއެވެ.
ޖަޕާނަކީ ރާއްޖޭގެ ތަރައްޤީއަށާއި، ޚާއްޞަކޮށް ކާރިސާތަކުން ރައްކާތެރިވުމުގެ ޤާބިލުކަން އިތުރުކުރުމަށް އެންމެ ބޮޑު އެހީތެރިކަމެއް ފޯރުކޮށްދެމުން އަންނަ ޤައުމެވެ. މިގޮތުން 1988 އިން 2006 އަށް މާލޭގައި ކުރިއަށް ގެންދިޔަ ކަނޑުތޮށިލުމުގެ މަޝްރޫޢުތައް ފާހަގަކޮށްލެވެއެވެ.
މި އެހީގެ ސަބަބުން މާލޭގެ ރައްޔިތުންނަށް ކުރިމަތިވަމުންދާ ތިމާވެށީގެ ގޮންޖެހުންތަކަށް ހައްލެއް ލިބި، ރައްކާތެރިކަން އިތުރުވެގެންދާނެކަމަށް ބެލެވެއެވެ.
