އިރާންގެ ރައީސް އިބްރާހީމް ރައީސީ ދަތުރުކުރައްވަމުން ގެންދިޔަ ހެލިކޮޕްޓަރު ވެއްޓިފައިވާ ކަމަށް އެ ގައުމުގެ ރަސްމީ ނިއުސް އެޖެންސީތަކުން ބުނެފިއެވެ.
އީރާނުގެ ތަސްނީމް ނޫސް އޭޖެންސީން ރިޕޯޓުކޮށްފައިވާ ގޮތުގައި އެކްސިޑެންޓު ހިނގީ ރައީސީ، ވެރިރަށް ތެހެރާނާ 375 މޭލު ދުރުގައި އޮންނަ ޖޮލްފާގައެވެ. އެއީ ބޯކޮށް ވާރޭ ވެހި، ދުންފިނި ބޯ ފަރުބަދަމަތީ ސަރަހައްދެއް ކަމަށް ރިޕޯޓުތަކުގައިވެއެވެ.
މީޑިއާ ރިޕޯޓުތައް ބުނާގޮތުގައި ރައީސް ރައީސީ އަޖަރުބައިޖާނަށް ކުރެއްވި މި ދަތުރަކީ އިއްޔެ އަޒަރުބައިޖާންގެ ޑޭމް އެއް އިފުތިތާހު ކުރައްވަން ކުރެއްވި ދަތުރެކެވެ.
އެ ހެލިކޮޕްޓަރުގައި ރައީސީގެ އިތުރުން ފޮރިން މިނިސްޓަރު ހުސައިން އާމިރު އަބްދުލްހައްޔާނާއި ވެސް އިންނެވި ކަމަށް އެ އޭޖެންސީން ބުނެފައިވެއެވެ. އަދި އެ ހެލިކޮޕްޓަރުގައި ތިބި ބަޔަކާ މުވާސަލާތު ކުރެވިފައިވާ ކަމުގެ މައުލޫމާތު ލިބިފައިވާ ކަމަށާއި، އެހެންވެ، އެ ހާދިސާގައި ޝާމިލްވާ ފަރާތްތައް ސަލާމަތުން ތިބި ކަމުގެ އުއްމީދު އޮތް ކަމަށް ރިޕޯޓުކޮށްފައިވެއެވެ.
އެ ހެލިކޮޕްޓަރަށް ދިމާވި އެކްސިޑެންޓާ ގުޅޭ އިތުރު ތަފުސީލެއް މިހާތަނަށް ހާމަކޮށްފައިިނުވެއެވެ.
