ބަންގްލަދޭޝްއަށް މިހާރު ކުރިމަތިވެފައިވާ މޫސުމީ ކާރިސާގެ ސަބަބުން ކުރިމަތިވި ފެންބޮޑުވުމާއި ބިންގަނޑު ކަނޑައިގެން ދިއުމުގެ ހާދިސާތަކާ ގުޅިގެން، ދިވެހި ސަރުކާރާއި ރައްޔިތުންގެ ނަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިޔާ ފޮނުއްވައިފިއެވެ.
ރައީސުލްޖުމްހޫރިއްޔާގެ އެކްސް އެކައުންޓުން ކުރެއްވި ޕޯސްޓެއްގައި ވިދާޅުވީ، ބަންގްލަދޭޝްގެ ބޮޑުވަޒީރު ތާރިޤް ރަޙްމާނަށާއި، އެ ޤައުމުގެ ސަރުކާރަށާއި ރައްޔިތުންނަށް މި ދަތި އުނދަގޫ ވަގުތުގައި އިޚްލާޞްތެރިކަމާއެކު ހަމްދަރުދީ ފޮނުއްވާ ކަމަށެވެ. އަދި މި ހާދިސާތަކުގައި ފުރާނަ ގެއްލުނު ފަރާތްތަކުގެ އާއިލާތަކަށް ކެތްތެރިކަން ދެއްވުމަށް އެދިވަޑައިގަންނަވާ ކަމަށްވެސް ރައީސް ވިދާޅުވިއެވެ.
ރައީސުލްޖުމްހޫރިއްޔާގެ މެސެޖުގައި އިތުރަށް ވިދާޅުވީ، މި ހިތާމަވެރި ދަނޑިވަޅުގައި ދިވެހިރާއްޖެ އޮތީ ބަންގްލަދޭޝްއާއެކު ސާބިތުކަމާއެކު ކަމަށެވެ. އަދި މި ހާދިސާތަކުގެ ސަބަބުން ދިރިއުޅުމަށް ބުރޫއަރާފައިވާ އެންމެހައި ފަރާތްތަކަށް ހިތްވަރު ދެއްވައި، އަސަރުކޮށްފައިވާ ސަރަޙައްދުތަކަށް އަވަސް ފަރުވާއަކާއި އާންމު ހާލަތަށް ރުޖޫޢަވުމަށް އެދިވަޑައިގަންނަވާ ކަމަށްވެސް އެމަނިކުފާނު ވިދާޅުވިއެވެ.
ބަންގްލަދޭޝްއަށް ކުރިމަތިވެފައިވާ މި ގުދުރަތީ ކާރިސާގައި ގިނަ ބައެއްގެ ފުރާނަ ގެއްލި، މުދަލަށާއި ގެދޮރަށް ބޮޑެތި ގެއްލުންތަކެއް ވަނީ ލިބިފައެވެ.
