ބޭންކް އޮފް މޯލްޑިވްސް (ބީއެމްްއެލް) އިން ލޯނު ދޫކުރާ މީހުންގެ އުމުރު 75 އަހަރަށް މަތިކޮށްފި އެވެ.
މިކަން އިއުލާނު ކުރީ މިއަދު ބީއެމްއެލް އިން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެ ބޭންކުގެ ސީއީއޯ އަދި މެނޭޖިން ޑިރެކްޓާ މުހައްމަދު ޝަރީފެވެ. އޭނާ ވިދާޅުވި ގޮތުގައި، ބޭންކުގެ ބޯޑުން މިހާރު ވަނީ ލޯނާއި ފައިނޭންސިން ފެސިލިޓީސް ދޫކުރާ އުސޫލުތަކަށް ބަދަލު ގެނެސް، އުމުރުގެ ހުރަސްތައް ކުޑަކޮށްފައެވެ.
މިއީ ގެދޮރު ގަތުމާއި އެފަދަ އިތުރު ކަންތައްތައް ކުރުމަށް ފަސޭހަކޮށްދިނުމުގެ ގޮތުން އެ ބެންކުން ނިންމި ނިންމުމެއް ކަމަށް ވިދާޅުވި އެވެ. އޭގެ އިތުރުން 75 އަހަރަށް ވުރެ މަތީ އުމުރުގެ މީހުންނަށް ވެސް އާމްދަނީ ލިބޭ ނަމަ ކްރެޑިޓް ކާޑު ނެގޭނެ ކަމަށް ވެސް ޝަރީފް ވިދާޅުވި އެވެ.
މީގެކުރިން ބީއެމްއެލްގެ އުސޫލު އޮތްގޮތުން ލޯނު ދޫކުރެވެނީ އުމުރުން 60 އަހަރުވާއިރު ލޯނު އަނބުރާ ދައްކާ ނިންމޭ ގޮތަށެވެ. ނަމަވެސް، ބީއެމްއެލް އިން މި ގެނައި ބަދަލާއެކު، މިހާރު އުމުރުން 18 އަހަރާއި 75 އަހަރާއި ދެމެދުގެ ކޮންމެ މީހަކަށްވެސް ލޯނަށް އެދި ހުށަހެޅުމުގެ ފުރުސަތު ހުޅުވިގެންދާނެއެވެ.
މިއަދުގެ މީޑިއާ ބްރީފިންގައި ޝަރީފް ވިދާޅުވީ، ރިސޯޓުތަކުގައި މަސައްކަތް ކުރާ މީހުންގެ ތެރެއިން ޑޮލަރުން ލޯނަށް ފައިސާ ދައްކަން ބޭނުންވާ މީހުންނަށް 1.5 ޕަސެންޓު ކުޑަކޮށް ލޯނަށް ފައިސާ ދެއްކޭނެ އިންތިޒާމު ވެސް މިހާރު ހަމަޖައްސާފައިވާ ކަމަށެވެ. އަދި ރިސޯޓުގައި މަސައްކަތް ކުރާ މީހުންގެ އިތުރުން ރާއްޖެއިން ބޭރުގައި ވަޒީފާ އަދާކުރާ މީހުންނަށް ވެސް މި އިންތިޒާމުގެ ދަށުން، އެ ރޭޓުގައި ލޯނު ދެއްކޭނެ ކަމަށް ވިދާޅުވި އެވެ.
