ރާއްޖޭގައި އާންމުކޮށް ފެތުރޭ ބަލިތަކުގެ ތެރޭގައި އަރިދަފުސް ރޯގާގެ ކޭސްތައް ދަށަށް ގޮސްފައިވާ ކަމަށާއި ނަމަވެސް ޑެންގީ ކޭސްތައް އިތުރުވަމުން އަންނަ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) ބުނެފިއެވެ.
އެޗްޕީއޭއިން މި މަހުގެ ނުވަވަނަ ދުވަހު އާންމުކުރި ތަފާސްހިސާބުގައިވާ ގޮތުން މިދިޔަ ފެބުރުވަރީ މަހާ އަޅާބަލާއިރު މިދިޔަ މަހު ޑެންގީ ހުން ޖެހިގެން ރިޕޯޓްކުރި އަދަދު ވަނީ އިތުރުވެފައެވެ. ނަމަވެސް، އަރިދަފުސް ރޯގާއާއި ބޭރަށް ހިންގުން ޖެހިގެން ރިޕޯޓްކުރި އަދަދު ވަނީ ދަށަށް ގޮސްފައެވެ.
އެޗްޕީއޭގެ ތަފާސްހިސާބުތަކުން ދައްކާގޮތުގައި، މިއަހަރުގެ ފެބުރުވަރީ މަހު އަރިދަފުސް ރޯގާ ޖެހިގެން ރިޕޯޓުކުރީ 25،010 ކޭސްއެވެ. ނަމަވެސް މާރިޗު މަހު މި އަދަދު ވަނީ 20،761 އަށް ދަށްވެފައެވެ. މިއީ ފެބުރުވަރީ މަހާ އަޅާބަލާއިރު ފާހަގަކޮށްލެވޭ ވަރުގެ ދަށްވުމެކެވެ.
ޑެންގީ ހުމުގެ ތަފާސްހިސާބުތަކަށް ބަލާއިރު، ފެބުރުވަރީ މަހު ރިޕޯޓްކޮށްފައިވަނީ 428 ކޭސްއެވެ. ނަމަވެސް މިދިޔަ މަހު މި އަދަދު ވަނީ 535 އަށް އިތުރުވެފައެވެ. މިއީ 2025 ވަނަ އަހަރުގެ މި މުއްދަތާ އަޅާބަލާއިރު ބޮޑު އިތުރުވުމެކެވެ.
ޑެންގީ ހުމަކީ އީޑީސް މަދިރީގެ ޒަރިއްޔާއިން ފެތުރޭ ނުރައްކާތެރި ބައްޔެކެވެ. މި ބަލީގެ އަލާމާތްތަކުގެ ތެރޭގައި ގަދައަށް ހުންއައުމާއި، ގައިގައި ރިއްސުމާއި، ލޮލުގެ ފަހަތުގައި ރިއްސުމާއި، ހުޅުހުޅުގައި ރިއްސުން ހިމެނެއެވެ. ބައެއް ހާލަތްތަކުގައި މި ބަލި ނުރައްކާތެރި ދަރަޖައަކަށް ގޮސް، ޑެންގީ ހެމޮރެޖިކް ފީވާ ފަދަ ފުރާނައަށް ނުރައްކާވާ ހިސާބަށްވެސް ދެއެވެ.
މި ބަލިން ރައްކާތެރިވުމަށްޓަކައި، ހަށިގަނޑު ނިވާވާގޮތަށް ހެދުން އެޅުމާއި، މަދިރި ރެޕެލެންޓް ބޭނުންކުރުމަށް އެޗްޕީއޭއިން އިލްތިމާސްކުރެއެވެ. އަދި މަދިރި އާލާވާ ފަދަ ފެން ހަރުލާ ތަންތަން ސާފުކުރުމަކީ މުހިއްމު ކަމެކެވެ. ބަލި ޖެހިއްޖެނަމަ ގިނައިން ދިޔާއެއްޗެހި ބޭނުންކުރުމަށާއި، ތިން ދުވަހަށްވުރެ އިތުރަށް ހުން އަންނަނަމަ ޑޮކްޓަރަށް ދެއްކުމަށް ވަނީ އިރުޝާދު ދީފައެވެ.
