މި ސަރުކާރުން އަލަށް ހުޅުވައިލި ބޯހިޔާވަހިކަމުގެ މަޝްރޫޢުގެ ދަށުން ގޯއްޗާއި ފްލެޓަށް އެދި މިހާތަނަށް 1،616 މީހުން ފޯމު ހުށަހަޅާފައިވާ ކަމަށް މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓުން މިއަދު ހާމަކޮށްފިއެވެ. މި މަހުގެ 18 ވަނަ ދުވަހު ހުޅުވައިލި މި ފުރުސަތުގައި މިހާތަނަށް ހުށަހެޅި ފޯމުތަކުގެ ތެރޭގައި ހިމެނެނީ ފްލެޓަށް އެދި ހުށަހެޅި 1،160 ފޯމާއި، ގޯއްޗަށް އެދި ހުށަހެޅި 456 ފޯމެވެ. މީގެ އިތުރުން 7،605 އެޕްލިކޭޝަނެއް ޑްރާފްޓް މަރުހަލާގައިވާ ކަމަށްވެސް އެ މިނިސްޓްރީން ބުނެފައިވެއެވެ.
"ޢާއިލީ ބޯހިޔާވަހިކަން" ޕްރޮގްރާމުގެ ދަށުން ކުރިއަށްގެންދާ މި މަޝްރޫޢުގައި ގޯއްޗާއި ފްލެޓަށް އެދި ހުށަހެޅުމުގެ ފުރުސަތު އޮތީ އީފާސް ލޮގިން މެދުވެރިކޮށް އެކަމަށް ޚާއްސަކޮށްފައިވާ ޕޯޓަލް މެދުވެރިކޮށެވެ. ގޯއްޗަށް އެދި ފޯމު ހުށަހެޅުމުގެ ސުންގަޑިއަކީ އަންނަ މާރިޗު މަހުގެ ހަތަރުވަނަ ދުވަހުގެ ރޭގަނޑު 23:59 އެވެ. އަދި ފްލެޓަށް އެދި ހުށަހެޅުމުގެ ފުރުސަތު އަންނަ އޭޕްރީލް މަހުގެ 17 ވަނަ ދުވަހުގެ ރޭގަނޑު 23:59 އާ ހަމައަށް ވަނީ ހުޅުވައިލެވިފައެވެ.
މި ސްކީމުގެ ދަށުން ޖުމްލަ 7،900 ފްލެޓާއި 1،250 އަކަފޫޓުގެ 15،000 ގޯތި ދޫކުރުމަށް ވަނީ ނިންމާފައެވެ. ގޯތި ދޫކުރުމަށް ހަމަޖެހިފައިވަނީ މައިގަނޑު ދެ ކެޓަގަރީއަކަށް ބަހާލައިގެންނެވެ. އެއީ މާލޭގެ ރަށްވެހިންނަށް ޚާއްސަ ކެޓަގަރީއާއި، މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ޚާއްސަ ކެޓަގަރީއެވެ. މާލޭ ރަށްވެހިންނަށް ގްރޭޓާ މާލޭ ސަރަހައްދުންނާއި ރަސްމާލެއިން ގޯތި ލިބޭއިރު، އެހެން ރަށްރަށުގެ ރަށްވެހިންނަށް ގޯތި ދޫކުރާނީ ހަމައެކަނި ރަސްމާލެއިންނެވެ.
މި ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ކުރިއަށްގެންދާ މި މަޝްރޫޢަކީ ގިނަ ބަޔަކަށް ބޯހިޔާވަހިކަން ކަށަވަރުކޮށްދިނުމަށް ފެށި މުހިންމު މަސައްކަތެކެވެ. މިނިސްޓްރީން ބުނި ގޮތުގައި، ގޯއްޗާއި ފްލެޓަށް އެދި ހުށަހަޅާ ފޯމުތައް ބަލައިގަތުމުގެ މަސައްކަތް ޕޯޓަލް މެދުވެރިކޮށް ހަލުވިކަމާއެކު ކުރިއަށްދާނެއެވެ. މިއީ މާލޭ ސަރަހައްދުގައި ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށް ސަރުކާރުން ކުރިއަށްގެންދާ އެންމެ ބޮޑު އެއް މަޝްރޫޢެވެ.
