ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރާއި މަހާޒު އަލީ ޒާހިރުގެ މައްޗަށް ކުރެވުނު ސުލޫކީ ތުހުމަތު ސާބިތުވާކަމަށް ނިންމައި، އެ ދެ ފަނޑިޔާރުން މަޤާމުން ވަކިކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.
މި މައްސަލައަކީ އަޒްމިރަލްދާގެ ފިރިކަލުން ޑރ. އިސްމާއިލް ލަތީފް ބަންދުން ދޫކޮށްލުމަށް ދަށު ކޯޓުގެ ގާޒީންނަށް ނުފޫޒު ފޯރުވިކަމަށް ބުނެ ޖުޑީޝަލް ސަރވިސް ކޮމިޝަން (ޖޭއެސްސީ) އިން ބެލި މައްސަލައެކެވެ. ޖޭއެސްސީގެ ތަޙުޤީޤަށް ހާމަވެފައިވާ ގޮތުގައި، ފަނޑިޔާރު މަހާޒު ބައިވެރިވެވަޑައިގެން، ކްރިމިނަލް ކޯޓުގެ ގާޒީ ސޮފްއަތު ހަބީބް މެދުވެރިކޮށް، ބަންދު މަޖިލިސް ބެލެހެއްޓެވި ގާޒީ އިބްރާހިމް ޒިހުނީއަށް ނުފޫޒު ފޯރުވާފައިވެއެވެ.
މި މައްސަލައިގައި މަޖިލީހުގެ ކައުންސެލް ޖެނެރަލް ފާތިމަތު ފިލްޒާ ވަނީ، ފަނޑިޔާރުންނާ ގުޅޭ މައްސަލަތައް ބެލުމުގައި ޖޭއެސްސީން އެކި މައްސަލަތަކުގައި އެކި ގޮތަށް ޢަމަލުކޮށްފައިވާ ކަމަށާއި، މިއީ ޤާނޫނުއަސާސީއާއި ޤާނޫނުން ކަށަވަރުކޮށްދީފައިވާ އެއްހަމައެއްގެ އުސޫލާ ޚިލާފު ކަމެއްކަމަށް ފާހަގަކުރައްވާފައެވެ.
ނަމަވެސް، މަޖިލީހުގެ ކޮމިޓީން ވަނީ ކައުންސެލް ޖެނެރަލްގެ ލަފާއާއެކު، ދެ ފަނޑިޔާރުން ވަކިކުރުމުގެ މައްސަލަ މަޖިލީހުގެ ތަޅުމަށް ފޮނުވުމަށް ނިންމާފައެވެ. މިއަދު ބޭއްވުނު މަޖިލީހުގެ ޖަލްސާގައި ދެ ފަނޑިޔާރުން ވަކިކުރުމަށް ވަކިވަކިން ނެގުނު ވޯޓުގައި، 68 މެންބަރުން ވަކިކުރުމަށް ތާއީދުކުރައްވައި، 11 މެންބަރުން ވަނީ ދެކޮޅަށް ވޯޓު ދެއްވާފައެވެ.
މި ނިންމުމާއެކު، ސުޕްރީމް ކޯޓުގެ ފަނޑިޔާރުކަމުގެ މަޤާމުން ޑރ. އަޒްމިރަލްދާ ޒާހިރާއި މަހާޒު އަލީ ޒާހިރު ވަކިވެގެން ދާނެއެވެ.
