މި ހާދިސާ ހިނގާފައި ވަނީ 'އަދަދު' ނޫހުން ރައީސްގެ މައްޗަށް ގަޒްފުގެ ތުހުމަތުވާ ގޮތަށް ތައްޔާރުކުރި ޑޮކިއުމަންޓަރީއެއްގައި ވާހަކަ ދެއްކި ރައީސް އޮފީހުގެ ކުރީގެ މުވައްޒަފަކަށް ރައީސް ފޯނުން ގުޅުއްވި ކަމަށް ބުނެ، ޝަހްޒާން ސުވާލު ކުރުމާ ގުޅިގެންނެވެ.
ނޫސްވެރިޔާގެ ސުވާލަށް ޖަވާބު ދެއްވަމުން ރައީސް މުއިއްޒު ވިދާޅުވީ، އެ މައްސަލައިގައި ކޯޓުން ނެރުނު އަމުރާ ނޫސްވެރިޔާ ހިލާފުވެފައިވާ ކަމަށެވެ. އަދި އެފަދަ ނޫސްވެރިޔަކަށް ނޫސްވެރިންގެ ބައްދަލުވުމުގައި އިތުރަށް ނުހުންނެވޭނެ ކަމަށް ރައީސް ކަނޑައެޅުއްވި އެވެ.
ރައީސްގެ އެ ނިންމެވުމާ އެކު، ރައީސް އޮފީހުގެ ސެކިއުރިޓީން ވަނީ ޝަހްޒާން އެ ބައްދަލުވުން އޮތް މާލަމުން ނެރެފައެވެ.
ފާހަގަކޮށްލެވޭ ގޮތުގައި، 'އަދަދު' ނޫހުން އާންމުކުރި އެ ޑޮކިއުމަންޓްރީއާ ގުޅިގެން އެ ނޫހުގެ އެޑިޓަރު ހަސަން މުހައްމަދާއި ސީއީއޯ ހުސައިން ފިޔާޒުގެ މައްޗަށް މިހާރު ވަނީ ދައުވާ އުފުލާފަ އެވެ.
