އީރާނުން ގަތަރުގެ ސަރަހައްދުތަކަށާއި އުރުދުން، ބަހްރައިން އަދި ކުވެއިތުގެ ސަރަހައްދުތަކަށް ދިން އައު ހަމަލާތައް ދައުލަތުގެ ފަރާތުން ހަރުކަށި އިބާރާތުން ކުށްވެރިކޮށްފިއެވެ. ގަތަރުން މި ހަމަލާތައް ސިފަކޮށްފައިވަނީ އެ ގައުމުތަކުގެ އިސްތިގުލާލާއި ސަރަހައްދީ ނަޒާހަތްތެރިކަމަށް އަރައިގަތުމުގެ ބޮޑު އުދުވާނެއް ގެ ގޮތުގައެވެ.
ގަތަރުގެ މިނިސްޓްރީ އޮފް ފޮރިން އެފެއާޒުން ނެރުނު ބަޔާނެއްގައި ބުނެފައިވަނީ، މި ހަމަލާތަކަކީ ބައިނަލްއަގުވާމީ ގާނޫނުތަކާއި، އދ. ގެ ޗާޓަރާއި، އަދި އަވަށްޓެރި ގައުމުތަކުގެ މެދުގައި އޮންނަންޖެހޭ ރަނގަޅު ގުޅުންތަކުގެ އުސޫލުތަކާ ކަނޑައެޅިގެން ހިލާފު އަމަލުތަކެއް ކަމަށެވެ.
މިފަދަ ހަމަލާތައް ކުރިއަށްދިއުމަކީ ސަރަހައްދީ ނުތަނަވަސްކަން ކުޑަކުރުމަށް ކުރެވޭ މަސައްކަތްތަކަށް ހުރަސްއެޅި، މެދުއިރުމަތީގެ ސަލާމަތާއި ހަމަޖެހުމަށް ކުރެވޭ ސިޔާސީ އަދި ޑިޕްލޮމެޓިކް މަސައްކަތްތައް ބަލިކަށިވެގެންދާނެ ކަމެއް ކަމަށް މިނިސްޓްރީން ފާހަގަކޮށްފައިވެއެވެ. އަދި މި ހަމަލާތަކުގެ ފުރިހަމަ ޒިންމާ އީރާނުން އުފުލަންޖެހޭނެ ކަމަށްވެސް ގަތަރުން ބުނެފައިވެއެވެ.
މިނިސްޓްރީން އިތުރަށް ބުނެފައިވަނީ، ބައިނަލްއަގުވާމީ ގާނޫނުތަކާއި އދ. ގެ ޗާޓަރުގެ 51 ވަނަ މާއްދާގެ ދަށުން ރައްދު ދިނުމުގެ ފުރިހަމަ ހައްގު ގަތަރަށް ލިބިގެންވާ ކަމަށެވެ. ގައުމުގެ އިސްތިގުލާލާއި، ސަލާމަތާއި، ރައްޔިތުންގެ ރައްކާތެރިކަން ކަށަވަރުކުރުމަށް އަޅަންޖެހޭ ހުރިހާ ފިޔަވަޅެއް އަޅާނެ ކަމުގެ ޔަގީންކަންވެސް ވަނީ ދީފައެވެ.
މީގެއިތުރުން، އުރުދުން، ބަހްރައިން އަދި ކުވެއިތާއެކު ގަތަރުން ސާބިތުކަމާއެކު އޮތްކަން ހާމަކޮށް، އެ ގައުމުތަކުގެ ގައުމީ ސަލާމަތް ރައްކާތެރިކުރުމަށް އަޅާ ގާނޫނީ ފިޔަވަޅުތަކަށް ތާއީދުކުރާނެ ކަމަށް ވަނީ ބުނެފައެވެ. ގަތަރުން ވަނީ ސަރަހައްދީ ހަމަޖެހުމަށް ނުރައްކާވާ ހުރިހާ އަސްކަރީ ހަރަކާތްތަކެއް ވަގުތުން ހުއްޓާލުމަށް ގޮވާލާފައެވެ.
ބަޔާން ނިންމާލަމުން ގަތަރުން ވަނީ އިތުރަށް މަސްރަހު ގޯސްވިޔަ ނުދިނުމަށާއި، ޑިޕްލޮމެޓިކް މަސައްކަތްތަކުގެ ތެރެއިން އެއްބަސްވެފައިވާ ކަންކަމަށް އިހުތިރާމްކޮށް، މަޝްވަރާގެ މޭޒަށް އެނބުރި އައުމަށް ހުރިހާ ފަރާތްތަކަކަށް އިލްތިމާސްކޮށްފައެވެ.
