އިންޑަސް ވޯޓަރސް މުއާހަދާ (އައި.ޑަބްލިއު.ޓީ) އަށް އިންޑިއާއިން ފާއިތުވި 60 އަހަރަށްވުރެ ގިނަ ދުވަހު އަމަލުކޮށްފައިވަނީ ވަރަށް ދީލަތިކަމާއެކު ކަމަށާއި، ނަމަވެސް ޕާކިސްތާނުން އިންޑިއާގެ ފެނުގެ މަޝްރޫއުތަކަށް ހުރަސްއަޅަމުންދާ ކަމަށް ބުނެ އިންޑިއާއިން އެގައުމުގެ ދިފާއުގައި ވާހަކަދައްކައިފިއެވެ. އިންޑިއާއިން ބުނާ ގޮތުގައި މިހާރު މިއީ އެގައުމަށް ހައްގުވާ ފެނުގެ މިންވަރު ފުރިހަމައަށް ހޯދަންވީ ވަގުތެވެ.
ޕާކިސްތާނުގެ "ޑޯން" ނޫހުގައި ޝާއިއުކުރި ލިޔުމަކަށް ރައްދު ދެއްވަމުން، އިންޑިއާގެ ކުރީގެ އިންޑަސް ވޯޓަރސް ކޮމިޝަނަރު އަތުލް ޖެއިން ވިދާޅުވީ، އިންޑިއާއިން މުއާހަދާއާ ހިލާފުވާ ކަމަށް ދައްކާ ވާހަކަތަކަކީ ހަގީގަތާ ހިލާފު ވާހަކަތަކެއް ކަމަށެވެ. އޭނާ ފާހަގަކުރެއްވި ގޮތުގައި 1960 ވަނަ އަހަރުގެ މި މުއާހަދާއަކީ ދުނިޔޭގައިވެސް އޮތް އެންމެ ދީލަތި އެއް އެއްބަސްވުމެވެ. އެގޮތުން އިންޑަސް ކޯރުގެ ފެނުގެ ނިޒާމުގެ ގާތްގަނޑަކަށް 80 އިންސައްތަ އިންޑިއާއިން ވަނީ ޕާކިސްތާނަށް ދޫކޮށްލާފައެވެ.
އިންޑިއާއިން ތުހުމަތުކުރާ ގޮތުގައި ކިޝަންގަންގާ، ރަޓްލޭ، އުރީ 2 އަދި ލޯވަރ ކަލްނައި ފަދަ ހައިޑްރޯއިލެކްޓްރިކް މަޝްރޫއުތަކަށް ޕާކިސްތާނުން ވަނީ ސިޔާސީ ބޭނުމެއްގައި ހުރަސްއަޅާފައެވެ. މީގެ އިތުރުން، މުއާހަދާގައި ކަނޑައަޅާފައިވާ މައްސަލަ ހައްލުކުރުމުގެ ނިޒާމުގެ ބޭރުން ޕާކިސްތާނުން ބައިނަލްއަގުވާމީ އާބިޓްރޭޝަނަށް މައްސަލަ ހުށަހަޅާފައިވާތީ އެކަމަށްވެސް އިންޑިއާއިން ވަނީ ފާޑުކިޔާފައެވެ.
މި މައުޟޫއާ ގުޅޭގޮތުން ސެންޓްރަލް ވޯޓަރ ކޮމިޝަނުގެ ކުރީގެ ޗެއާމަން އަތުލް ޖެއިން ވިދާޅުވީ، "ހައްގު ކާ ޕާނީ" ނުވަތަ އިންޑިއާއަށް ހައްގުވާ ފެން ހޯދުމުގެ އާ ސިޔާސަތެއްގެ ދަށުން، އިންޑިއާއަށް ކަނޑައެޅިފައިވާ ކޮންމެ ފެންތިއްކެއްގެ ފައިދާ އެގައުމުގެ ރައްޔިތުންނަށް ލިބިދޭންޖެހޭ ކަމަށެވެ. އޭނާ ވިދާޅުވީ ޕާކިސްތާނުން ފެން މެނޭޖްކުރުމުގައި ފެއިލްވެ، ގިނަ އަދަދެއްގެ ފެން ބޭކާރުވެގެން ކަނޑަށް ދާއިރު، އިންޑިއާގެ ގިނަ ސްޓޭޓްތަކަކަށް ފެނުގެ ދަތިކަން ކުރިމަތިވަމުންދާ ކަމަށެވެ.
އިންޑިއާއިން ބުނާ ގޮތުގައި 2023 ވަނަ އަހަރު އެގައުމުން މުއާހަދާ އިސްލާހުކުރުމަށް ފޮނުވި ނޯޓިސްއަކީ ބަދަލުވަމުންދާ ހާލަތްތަކަށާއި، އިންޑިއާގެ ތަރައްގީގެ ބޭނުންތަކަށް ރިއާޔަތްކޮށް ފޮނުވި ނޯޓިސްއެކެވެ. އަދި ދެ ގައުމުގެ ދެމެދުގައި އޮތް ގުޅުން ގޯސްވެ، ހިންގަމުންދާ ޓެރަރިސްޓް ހަމަލާތަކުގެ ސަބަބުން، މި މުއާހަދާ ބިނާވެފައިވާ އިތުބާރު ގެއްލިފައިވާ ކަމަށްވެސް އިންޑިއާއިން ފާހަގަކުރެއެވެ.
ނިންމާލަމުން އިންޑިއާގެ އޮފިޝަލުން ވިދާޅުވީ، އިންޑިއާއިން މި މުއާހަދާ ދޫކޮށްލަނީ ނޫން ކަމަށާއި، ނަމަވެސް ބޭނުންވަނީ އިންޑިއާގެ ސިޔާދަތީ ހައްގުތައް ހިމާޔަތްކުރެވޭނެ ފަދަ ޒަމާނީ އަދި އިންސާފުވެރި މާނަކުރުމެއްގެ ދަށުން އިންޑިއާއަށް ހައްގުވާ ފެނުގެ މިންވަރު ފުރިހަމައަށް ބޭނުންކުރުމަށް ކަމަށެވެ.
